Hlaup eru ódýr og einföld líkamsrækt á færi flestra. Mörgum vex það samt í augum að byrja að hlaupa og vita ekki hvernig er best að bera sig að. Hér eru ýmsar upplýsingar og leiðbeiningar fyrir byrjendur.
Af hverju hlaup?
Hlaup eru góð líkamsrækt, þú eykur þol og úthald og styrkir lungu, hjarta og æðakerfi með því að hlaupa.
Hlaup fela í sér hressandi útiveru, þú færð súrefni í lungun og kemst í snertingu við íslenska veðráttu í öllum sínum fjölbreytileika.
Hlaup eru góð leið til að losa sig við aukakílóin og/eða halda þeim í burtu.
Hlaup eru tiltölulega einföld íþrótt, þú þarft ekki að læra flókin spor eða leikreglur, bara reima á þig skóna og skeiða af stað.
Þú getur spjallað við æfingafélagana á meðan þú æfir.
Þú ert ekki bundinn af tíma eða íþróttamannvirkjum,
allt sem þarf eru góðir skór og vilji.
Það er hægt að taka sportið með sér hvert á land sem er.
Göngustígarnir í Fossvoginum, fjárgöturnar á Ströndum og
almenningsgarðar í erlendum stórborgum taka vel á móti
ferðalöngum.
Góð ráð fyrir þá sem eru að byrja að hlaupa
Vilji er grundvöllur árangurs í öllu sem við tökum okkur fyrir hendur. Í hlaupunum er jafn mikilvægt að hlúa að og viðhalda viljanum og að stunda æfingarnar. Enda segir það sig sjálft að án vilja verða engar æfingar.
Farðu rólega af stað og ekki ætla þér um of. Öruggasta leiðin til að mistakast er að fara of skarpt af stað, -ætla að taka þjálfunina með trompi og hlaupa langt og hratt á hverjum degi. Vissulega er einstaklingsbundið hversu skarpt hentar fólki að fara af stað, en fyrir flesta er passlegt að hlaupa 2-3 í viku fyrsta mánuðinn.
Ef þú hefur ekki stundað neina líkamsrækt áður getur verið gott að hlaupa og ganga til skiptis í fyrstu túrunum og auka smám saman þann hluta leiðarinnar sem þú hleypur. Þegar þú getur hlaupið alla leiðina ferðu síðan að lengja hringinn þinn. -Og áður en þú veist af ertu farin/n að hlaupa 10 km. án þess að blása úr nös.
Ef þú hefur stundað líkamsrækt áður og hefur sæmilegt þol og úthald geturðu byrjað skarpar. 5-7 km. hringur ætti að vera í góðu lagi. Passaðu samt að fara ekki of geyst fyrstu vikurnar því þó þolið sé gott þarf líkaminn tíma til að venjast nýrri hreyfingu. Verkir í hnjám eða öklum eru ekki óalgegnir hjá þeim sem eru að skipta yfir í hlaupin úr öðrum íþróttum. Láttu nægja að hlaupa 2-3 í viku fyrstu vikurnar og taktu frekar aðra líkamsrækt með.
Veldu tíma sem þér hentar. -Ef þú ert þung/ur í gang á morgnanna skaltu ekki láta þér detta í hug að ætla að fara á fætur kl. hálf sjö og hlaupa áður en þú mætir í vinnuna. -sumum hentar morguninn, öðrum hádegið, seinni parturinn eða kvöldið.
Sumum hentar best að hlaupa einir á meðan aðrir sækja í félgasskapinn. Þeir sem eru að byrja eru oft feimnir við að mæta í hlaupahóp og vilja frekar skokka einir á sínum hraða sem getur verið ágætt til að ná upp þoli og sjálfsöryggi. Hópurinn veitir hins vegar líka mikilvægt aðhald, félagsskap og hvatningu sem hjálpar til við að halda fólki við efnið.
Hlaup krefjast ekki mikils sérhæfðs búnaðar. Góðir skór eru þó nauðsynlegir og þægilegur íþróttafatnaður. Venjulegir íþróttaskór duga í fyrstu túrana en þegar þú ert farin/n að sjá að hlaupin eru eitthvað fyrir þig skaltu fjárfesta í góðum hlaupaskóm. Annar sérhæfður hlaupafatnaður getur beðið, en skórnir eru undirstaðan og það borgar sig að leggja svolítið í þá.
Góðar hlaupaleiðir fyrir byrjendur á Akureyri
Gömlu leirubrýrnar
Mjög auðveld og þægileg leið. Marflatt, engin bílaumferð og fullt af fólki á gangi (svo þú skerð þig ekki úr þó þú ákveðir að ganga hluta af leiðinni). Það eru u.þ.b. 2,5 km. yfir brýrnar svo með því að fara fram og til baka má ná 5 km. en auðvitað er hægt að snúa við hvenær sem er og það eru kílómetramerkingar á nokkrum stöðum.
Kjarnaskógur
Trimmbrautin er 2,2 km. en auk þess liggur fullt af skemmtilegum stígum um skóginn. Í skóginum er skjól fyrir veðri og vindum og einstaklega fallegt umhverfi. Brekkurnar geta þó reynst byrjendum erfiðar, en það er allt í lagi að ganga upp þær erfiðustu.
Naustaborgir
Leiðin gegnum Naustaborgirnar og inn í Kjarna er um 3-4 km. löng en hægt er að velja um nokkra hringi, gott kort af svæðinu er við bílastæðið sunnan golfvallarins.
Hitaveiturörin
Meðfram hitaveiturörunum liggur vegarslóði frá Naustavegi og inn í Kjarna. Fyrri hluti hans er malbikaður en síðan tekur við grýttur vegarslóði. Engin umferð og falleg leið um 1,5 km. löng. Hægt að lengja með því að hlaupa áfram inn í Kjarna, niðrá leiruveginn eða eftir Drottningarbrautinni til baka.
Rangárvellir
Ofan við Rangárvelli liggur gamall malarvegur inn að Giljahverfi (neðan við hesthúsahverfið) þarna er lítil sem engin umferð og þægilegt að hlaupa. Frá Giljahverfinu og að spennustöðinni við Rangárvelli er um 1 km. en hægt er að hlaupa hring niður á Hlíðarbraut, lengja túrinn upp Lögmannshlíðina, eða áfram eftir ýmsum vegarslóðum sem liggja um þetta svæði. Athugið þó að eitthvað af þessum vegum eru reiðvegir og tölverð umferð ríðandi manna um svæðið. Hestunum er mörgum hverjum illa við hlaupandi menn og því nauðsynlegt að hægja á sér og fara vel út í kant til að mætast.
Háskólastígurinn
Skemmtileg leið innanbæjar, auðvelt að búa sér til hring hvort heldur sem er frá brekkunni eða þorpinu, en vissulega svolitlar brekkur. Frá Þingvallastrætinu og að undirgöngunum er u.þ.b. 1 km. þar er hægt að beygja upp Borgarbrautina og hlaupa eftir göngustígnum neðan við Hlíðarbrautina, þessi hringur er u.þ.b. 2,5 km. Það má líka fara undir Borgarbrautina og hlaupa eftir göngustíg ofan við Þórssvæðið, upp Skarðshlíðina og upp að Hlíðarbraut eða aftur inn á Háskólastíginn, þá er hringurinn orðinn um 5 km.
