Fréttir

Keppendur UFA stóðu sig afar vel á Meistaramóti Íslands um liðna helgi. Ungmennafélag Akureyrar eignaðist sex Íslandsmeistara ásamt því að koma heim með þrjú silfur og eitt brons. Í stigakeppninni endaði kvennalið UFA í 3.sæti og karlaliðið í 4.sæti en í heildarstigakeppninni lenti UFA í fjórða sæti með 13197 stig sem telst mjög góður árangur. Kolbeinn Höður Gunnarsson sigraði í 100m hlaupi karla á tímanum 10,89 sek. og í 200m á 21,76 sek. Stefán Þór Jósefsson sigraði í hástökki með stökk upp á 1,82 metra. Í þrístökki hafnaði Stefán Þór í öðru sæti með stökk upp á 13,44 m. Hafdís Sigurðardóttir sigraði langstökkið örugglega með stökk upp á 6,39 m. Hafdís lét ekki þar við sitja heldur bætti tveimur Íslandsmeistaratitlum í safnið og sigraði í 100 m hlaup kvenna á 12,02 sek og í 200m hlaupi á 24,43 sek. Steinunn Erla Davíðsdóttir lenti í öðru sæti í 100 m hlaupi kvenna á tímanum 12,50 sek. Selma Líf Þórólfsdóttir lenti í öðru sæti í hástökki þegar hún stökk yfir 1,60 metra. Rakel Ósk Dýrfjörð Björnsdóttir hafnaði í þriðja sæti í stangarstökki kvenna með stökk upp á 3,12 metra. Hægt er að sjá öll úrslit mótsins hér http://46.149.29.198/motfri/SelectedCompetitionEvents.aspx

Í dag hefst 89. Meistaramót Íslands á Kópavogsvelli þar sem flest okkar besta frjálsíþróttafólk mætir til leiks. UFA á ellefu keppendur á þessu móti í ár og verður spennandi að fylgjast með gengi hópsins. Minnum á að úrslit mótsins er að finna hér http://46.149.29.198/motfri/SelectedCompetitionEvents.aspx

Þrátt fyrir kulda og tæknilega örðuleika þá gekk Akureyrarmótið mjög vel og margir með bætingu, sjá úrslit hér http://mot.fri.is/cgi-bin/ibmot/timesedillib2496.htm Hafdís Sigurðardóttir sem stefnir að því að ávinna sér rétt til þáttöku á HM í Kína í lok ágúst átti góða stökkseríu. Hafdís stökk sex sinnum yfir 6 metra og þar af voru fimm stökk á bilinu 6,25 til 6,45. Vindur var á bilinu 0,9-2.6 m/sek á meðan langstökkskeppnin fór fram. Fimm stökk Hafdísar voru löggild þar sem vindhraði var undir 2.0m/sek. Lengsta stökk Hafdísar við löglegar aðstæður mældist 6,33m. Það verður spennandi að fylgjast með henni á Meistaramóti Íslands um næstu helgi. Í lokin vill stjórn UFA þakka öllum þeim sem komu að vinnu á Akureyrarmótinu kærlega fyrir hjálpina. Án ykkar er ekki hægt að halda mót fyrir börnin okkar. Áfram UFA