Akureyrarmót UFA og Norðlenska var haldið 21. ágúst síðastliðinn í veðurblíðu. Níutíu keppendur mættu til leiks, flestir voru iðkendur UFA en einnig mættu góðir hópar frá Þingeyingum, Skagfirðingum og Húnvetningum auk annarra sem sumir hverjir komu lengra að.
Íslandsmet í sleggjukasti 14 ára stúlkna (3,0 kg) var slegið af Birnu Jónu Sverrisdóttur UÍA, þegar hún kastaði sleggjunni 41,98 m, óskar UFA henni innilega til hamingju með árangurinn.
Keppt var í sjö greinum í flestum aldursflokkum 10 ára og eldri og því var dagurinn strembinn hjá þeim sem kepptu í flestum eða öllum greinum sem í boði voru. Keppendur stóðu sig reglulega vel og mikið var um bætingar. Öll úrslit má finna á eftirfarandi hlekk: Þór - Mótaforrit FRÍ
Fyrir yngstu keppendurnar var boðið upp á þrautabraut þar sem þau kepptu í spretthlaupi, langstökki, skutlukasti, reipitogi og hindrunarhlaupi. Krakkarnir voru kappsfull og höfðu bæði þau og foreldrar þeirra gaman af, enda hafa þau eflst á fjölbreyttum frjálsíþróttaæfingum sumarsins.
Stjórn UFA þakkar keppendum og starfsmönnum mótsins kærlega fyrir árangursríkt og skemmtilegt mót.
Myndir: Unnar Vilhjálmsson
