Meistaramót Íslands í frjálsum um næstu helgi á Þórsvelli

94. Meistaramót Íslands í frjálsum fer fram nú um næstu helgi, 25.-26. júlí.

Eins og kunnugt er fengum við hjá UFA beiðni um að halda mótið með stuttum fyrirvara, þannig að sl.daga og vikur hefur stjórn, þjálfarar og aðrir velunnarar félagsins staðið í ströngu við skipulagningu og undurbúning. Á móti sem þessu þarf margar hendur og fólk sem þekkir vel til og kunnum við þeim sem eru að leggja á sig vinnu til að gera þetta mót sem glæsilegast, bestu þakkir fyrir.

Það stefnir í glæsilegt mót og um tæplega 200 keppendur mæta til leiks. Ljóst er að búast má við hörkukeppni, í fjölmörgum greinum. Í sleggjukasti mætast  þær Vigdís Jónsdóttir úr FH og Elísabet Rún Rúnarsdóttir úr ÍR, en Vigdís hefur bætt metið að undanförnu og Elísabet átti gamla metið í fyrra.

Við hjá UFA hlökkum til að bjóða keppendur og gesti velkomna til Akureyrar, og eiga hér góða og spennandi keppni á best búna frjálsíþróttavelli landsins nú um stundir.